Соёл урлаг, спорт

“ВОЛЕЙБОЛЫН ИДЭРЧҮҮДИЙН УЛСЫН АВАРГА ШАЛГАРУУЛАХ ТЭМЦЭЭН” МАРГААШ ЭХЭЛНЭ

Монголын Волейболын холбооноос жил бүр зохион байгуулдаг “Волейболын идэрчүүдийн Улсын аварга шалгаруулах тэмцээн” 2019 оны 04-р сарын 02-09 ний хооронд Ховд аймагт болно. Аймгийн Засаг даргын ивээл дор ЗДТГ, БТСГ, аймгийн Волейболын холбоо хамтран зохион байгуулж буй Олон улсын хэмжээний мастер С.Кенесханы нэрэмжит “ХОВД-2019” тэмцээнд бүсийн тэмцээний эхний 3 байранд шалгарсан эрэгтэй эмэгтэй нийт 32 багийн тамирчид оролцохоос Өмнөговь аймгийн эрэгтэй багаас бусад 31 багийн  тамирчид оролцож хурд хүч, авхаалж самбаагаа сорин өрсөлдөх юм.

Өөрөөр хэлбэл Ховд, Говь-Алтай, Завхан, Баян-Өлгий, Хэнтий, Баянхонгор, Говьсүмбэр,  Өмнөговь, Дундговь, Дорноговь, Булган, Дархан уул, Орхон, Архангай аймаг, Нийслэлийн Баянзүрх, Баянгол, Хан-Уул, Багануур дүүрэг, Хилчин спорт хороо, Эрчим-38 клубын 400 орчим тамирчид багш, дасгалжуулагчдынхаа хамтаар Олон ястны өлгий нутаг, баруун бүсийн тулгуур төв Ховд аймагт хүрэлцэн ирээд байна.

Өнөөдөр зохион байгуулагчид техникийн зөвлөгөөнийг зохион байгуулж, багууд сугалаа татлаа. Сугалаа ёсоор маргааш буюу 04-р сарын 02 ны өглөө 08:30 цагт хөвгүүдийн тоглолт аймгийн БТСГ-ын спортын ордонд Хэнтий-Ховд, охидын тоглолт Ховд их сургуулийн спорт зааланд Говь-Алтай-Хөвсгөл аймгаар тус тус эхэлнэ.

Тэмцээний ерөнхий шүүгчээр улсын шүүгч А.Дорж ажиллана. Мөн шүүгчээр А.Баясгалан, Х.Золдэлгэр, Ц.Алтанбулаг, Ч.Батбаатар, С.Мөнхдэлгэрнар мөн Азийн Волейболын холбооны Олон улсын шүүгч Г.Золбаяр, Монголын Волейболын холбооны шүүгч Э.Галхүү, О.Золбоо, Г.Болд-Эрдэнэ, Э.Энхмөрөн Т.Уранчимэг нар ажиллах юм. Тэмцээний нээлтийн ёслолын үйл ажиллагаа 04-р сарын 03 ны 15:00 цагт аймгийн Биеийн тамир, спортын ордонд болох ба нээлт, феналын тоглолтыг Олон ястны телевизийн уран бүтээлчид шууд дамжуулан үзүүлэх юм.