1кг махны үнэ 7500-8000 төгрөг боллоо. Удахгүй малын үнэ буурна
2021-9-14
Цаг үеийн мэдээ
Сүүлийн үед мал, махны үнэ нэмэгдэж иргэдийн эдийн засаг, худалдан авалтад нөлөөлж байна. Тухайлбал, хонь, үхрийн мах л гэхэд зах худалдааны төвүүдэд 1 кг нь 12000-14000 төгрөгт хүрч худалдаалагдаж байв.
Тэгвэл аймгийн “ОНЦГОЙ КОМИСС”-ын 2021 оны 08 дугаар сарын 31-ний өдрийн 67 дугаар тогтоолоор махны нөөц бүрдүүлэх, мал, махны үнэ бууруулах, махны хэмжээг нь нэмэгдүүлэх тал дээр арга хэмжээ авч ажиллахаар шийдвэрлэсэн. Үүний үр дүнд “ШИНЭ ХОВД” баруун бүсийн хөгжлийн корпораци болон Хан Жаргалант Ховд хоршоотой шууд гэрээ байгуулан ажиллаж байна.
“ШИНЭ ХОВД” баруун бүсийн хөгжлийн корпораци малыг /хонь/ малчдын гар дээрээс шууд худалдан авалт хийж ямар нэгэн нэмүү өртөг шингээхгүйгээр хэрэглэгчдэд хүргэх ба мал худалдан авах, тууварлаж ирэх ажлын хэсгийг 09 дүгээр сарын 08-аас эхлэн 2 чиглэлд гаргаад байна.
Удахгүй “ТАВАН БАЯЛАГ” захыг түшиглэн малыг /хонь/ зах зээлийн ханшаас харьцангуй хямд үнээр худалдан борлуулна.
Харин Хан Жаргалант Ховд хоршоо хонины 1 кг махыг 7500-8000 мянган төгрөгөөр худалдан борлуулж эхэлжээ.
Иймд иргэд дээрх хоршоо, малын захаас хямд үнэтэй мал, мах худалдан авах боломж бүрдэж байна.