4-р сарын 15-ны өдрийн аймгийн Онцгой комиссын хурлаар хүн, мал, амьтны халдварт өвчнөөс урьдчилан сэргийлэх үүднээс Жаргалант сумын нутаг дэвсгэрт байгаа малын сэг зэм бусад хог, хаягдлыг булшлах ажлыг хийх гүйцэтгэхийг Хот тохижилтийн газрын дарга Л.Дорждэрэмд үүрэг болгосон. Мөн хаягдлыг цэвэрлэхэд шаардлагатай зардлыг хог хаягдлын төсвөөс гүйцэтгэлээр санхүүжүүлэх үүрэг даалгаврыг Жаргалант сумын Засаг дарга бөгөөд Ховд хотын захирагч Ц.Ганданповронд өгсөн. Энэ ажлын явц, Жаргалант сумын нутаг дэвсгэр дэх хогийн цэгийн нөхцөл байдалтай аймгийн Засаг даргын орлогч Т.Жаргалсайхан, ИТХ-ын нарийн бичгийн дарга Б.Сандагсүрэн, ИТХ-ын ОНХХ-ийн дарга Ш.Батсүх нарын тэргүүтэй холбогдох албаны хүмүүс газар дээр нь очиж танилцан, үүрэг даалгаврын дагуу ажлаа эрчимжүүлж ажиллахыг сануулав. Аймгийн ИТХ-ын шийдвэрээр 2019 онд Жаргалант сумын хур хог хаягдлыг цэвэрлэхэд зориулж 30 сая төгрөг баталсан бөгөөд Жаргалант суманд тус төсвийг зарцуулах эрхийг шилжүүлсэн байна.