“Бүсчилсэн хөгжил-Төрийн албаны манлайлал” сэдэвт баруун бүсийн зөвлөгөөн Ховд аймагт болж байна. Зөвлөгөөнд Ховд, Увс, Завхан, Говь-Алтай, Баян-Өлгий аймгийн төрийн албан хаагчдын төлөөлөл 700 гаруй төрийн албан хаагч оролцож байгаа юм. Хоёр өдөр үргэлжлэх тус зөвлөгөөний эхний өдөр дөрвөн салбар хэлэлцүүлгийг өрнүүлж байгаагийн нэг нь “Төрийн албаны хууль тогтоомжийн хэрэглээ” хэлэлцүүлэг байлаа. 



Баруун таван аймгийн төрийн албаны салбар зөвлөлийн дарга, гишүүд, төрийн захиргааны удирдах, гүйцэтгэх албан тушаалтнууд гээд 350 албан хаагч оролцсон тус хэлэлцүүлгийг Төрийн албаны зөвлөлийн гишүүн Б.Идэрчулуун нээн үг хэлж, оролцогчдод амжилт хүсэв. 



Мөн Төрийн албаны зөвлөлийн Ажлын албаны Хүний нөөцийн удирдлага, аудитын газрын дарга С.Нямбаяр “Төрийн албаны тухай хууль болон журмын хэрэглээний зарим асуудал” сэдвээр, ТАЗ-ийн Маргаан хянан шалгах газрын дарга Ч.Бат-Эрдэнэ Төрийн албаны шинэтгэл, хууль тогтоомжийн хэрэгжилт, хэрэглээ сэдвээр тус тус мэдээлэл өгч, энэ чиглэлд төрийн албан хаагчдын өмнө тулгамдаж буй ямар асуудал байгаа талаар тэдний саналыг сонсов. 



Хэлэлцүүлгийн үеэр хөндөгдсөн асуудлыг нэгтгэж, хуулийн шинэчлэлд тусгаж ажиллах юм.