Батлан хамгаалахын дэд сайд, хошууч генерал Д.Баасандамба тэргүүтэй ажлын хэсэг өчигдөр /2026.05.06/ Ховд аймагт ажиллав.
 

Албан томилолтын үеэр аймаг, орон нутгийн удирдлагууд, төрийн цэргийн болон хууль сахиулах байгууллага, хэлтэс агентлагийн дарга нартай уулзаж Монгол улсад орон нутгийн хамгаалалтын ач холбогдол, үр дүнг таниулах зорилго бүхий “Цогц батлан хамгаалах бодлого" илтгэлийг сонордуулав. 


 Мөн “Орон нутгийн хамгаалалтын тухай хууль”-ийн хэрэгжилтийн өнөөгийн байдлыг хэлэлцэж, цаашид тус хуульд оруулах нэмэлт өөрчлөлтүүдийн талаар санал солилцлоо.

Дараа нь Ховд аймагт үйл ажиллагаа явуулж байгаа төрийн цэргийн болон хууль сахиулах байгууллагуудын алба хаагчидтай уулзав. 


 Энэ үеэр:
 Монгол Улсын Ерөнхийлөгчийн ивээл дор 2026 оныг “Залуу офицеруудын хөгжлийн жил”, Батлан хамгаалах яамнаас 2026 оныг “Хүн төвтэй хөгжил-шинэчлэлийн жил” болгон зарласантай холбогдуулан “Хүн төвтэй хөгжил” сэдвээр илтгэл танилцууллаа.
 

Уулзалтад аймгийн Иргэдийн Төлөөлөгчдийн Хурлын дарга З.Эрхбаяр оролцож батлан хамгаалах бодлого, үйл ажиллагааг бүх талаар дэмжиж хамтран ажиллахаа илэрхийлэв.