Итгэл хүлээсэн, ёс зүйтэй төрийн албыг хөгжүүлэх зорилгын хүрээнд “ТӨРИЙН АЛБАНЫ ШИНЭТГЭЛ-ТӨРИЙН БҮТЭЭМЖ” сэдэвт сургалтыг УИХ-ын Хууль зүйн байнгын хороо, Төрийн албаны зөвлөл, Ховд аймгийн Засаг даргын Тамгын газар, НҮБ-ын Хөгжлийн хөтөлбөртэй хамтран зохион байгууллаа. Зөвлөгөөн, сургалтыг нээж Ховд аймгийн Засаг дарга Б.Дүгэржав, УИХ-ын гишүүн, ХЗБХ-ны дарга С.Бямбацогт нар үг хэлэв. Сургалтад Төрийн албаны зөвлөлийн дарга Б.Баатарзориг, Төрийн албаны зөвлөлийн Сонгон шалгаруулалтын газрын дарга Т.Сосорбарам, НҮБ-ын Хөгжлийн хөтөлбөрийн “Монгол Улсад мэргэжлийн, иргэн төвтэй төрийн албыг төлөвшүүлэх нь" төслийн зөвлөх П.Баярцэцэг нар “Төрийн албаны шинэтгэл”, “Сэтгэлгээний өөрчлөлтөөр төрийн албаны шинэтгэлийг эрчимжүүлэх нь: Системийн сэтгэлгээ, Зан үйлийн ухаан, Дизайн сэтгэлгээ”, “Төрийн албаны үнэт зүйлс, ёс зүй, шийдвэр гаргалт, нөлөөлөх хүчин зүйл, сорилт”, “Төрийн албаны сонгон шалгаруулалтын шинэтгэл” сэдвүүдээр мэдээлэл өгсөн байна. Энэ удаагийн сургалтад Ховд аймгийн бүх шатны төрийн байгууллагын 600 гаруй удирдах, гүйцэтгэх албан тушаалын төрийн албан хаагчид оролцлоо. Ховд аймгийн Хөдөлмөр, халамж үйлчилгээний газар, Татварын хэлтэс, Ерөнхий боловсролын 7 дугаар дунд сургууль, Ховд хотын захирагчийн Ажлын албаны төрийн албан хаагчид, Салбар зөвлөлийн дарга, гишүүд, ахмад төрийн албан хаагч, зарим иргэдтэй уулзаж төрийн албаны шинэтгэл, төрийн албаны бүтээмж, төрийн албаны шалгалтын талаар Төрийн албаны зөвлөлийн дарга Б.Баатарзориг дэлгэрэнгүй мэдээлэл хийж, тэдний саналыг сонсож, үйл ажиллагаанд тусгаж ажиллахаа онцоллоо. Сургалтад хамрагдсан удирдах албан тушаалтнууд байгууллага бүр дээрээ төрийн албаны бүтээмж, төрийн албан хаагчдын хандлага, соёлыг өөрчлөх талаар сургалт, мэдээллийг шуурхай хүргэж төрийн албаны шинэтгэлийн бодлого, үйл ажиллагааг эрчимжүүлж байна.