Жаргалант сумын 9 дүгээр цэцэрлэг аймагтаа хамгийн олон хүүхэдтэй томоохон цэцэрлэг болно

Жаргалант сумын 9 дүгээр цэцэрлэгийн барилгын ажлыг Улсын төсвийн 2,4 тэрбум төгрөгийн хөрөнгө оруулалтаар “Ганбүрэн” ХХК барьж гүйцэтгэж байна. 2020 онд барилгын ажил нь эхэлсэн тус бүтээн байгуулалтыг энэ оны 08 дугаар сарын 20 гэхэд бүрэн дуусгаж ашиглатад хүлээлгэн өгөх гэрээтэй. Барилга, хийцийн хувьд яг энэ зургаар Ховд аймагт баригдаж буй анхны цэцэрлэг. Анги бүхэн аваарын хаалгатай, 00, угаалтуур, шүршүүртэй гээд хамгийн сүүлийн үеийн загвараар баригдаж байгаа гэдгээрээ онцлогтой юм. Өнөөдрийн байдлаар /2021.06.29/ барилгын ажлын гүйцэтгэл 60-70 хувьтай явагдаж байна.

Тус цэцэрлэг ашиглалтад орсоноор сургуулийн өмнөх боловсролд хамрагдах хүүхдийн тоо 100-аар нэмэгдэж нийт 240 буюу Ховд аймагтаа хамгийн олон хүүхэдтэй томоохон цэцэрлэг болох юм. Өөрөөр хэлбэл шинээр 3 бүлэг нээгдэнэ. Ажлын байр ч бас нэмэгдэнэ.

Жаргалант сумын 10 дугаар цэцэрлэгийн барилгын өргөтгөлийн ажил 90 хувьтай явагдаж байна Тус цэцэрлэгийн барилгыг “Турлиахт” ХХК Улсын төсвийн 1 тэрбум 40,0 сая төгрөгийн хөрөнгө оруулалтаар барьж гүйцэтгэж байгаа. 2020 онд барилгын ажлын 80 орчим хувийг хийж гүйцэтгэсэн. Энэ оны 08 дугаар сарын 25-30-ны хооронд ашиглалтад хүлээлгэн өгөх гэрээтэй ажиллаж байна. Коронавируст халдварын нөхцөл байдлаас шалтгаалан барилгын материал татан авах ажил удааширч 45 хоног ажил нь зогсчээ. Одоо шаардлагатай бүх материалаа татан авсан. Бүх анги танхимын хаалга суурилуулах, дотоод засал гаднах орчны тохижилтын ажил үлдлээ. Үүнийг 21 хоногийн хугацаанд хийж дуусган хугацаанаасаа өмнө ашиглалтад хүлээлгэн өгөх төлөвлөгөөтэй ажиллаж байна гэж барилгын ерөнхий инженер Л.Батхишиг хэллээ.

Эдгээр цэцэрлэгүүдийн барилгын ажлын явцтай өнөөдөр /2021.06.29/ аймгийн Нийгмийн бодлого хариуцсан орлогч дарга Т.Дэлгэрсайханаар ахлуулсан ажлын хэсэг танилцав. Ажлын хэсгийн бүрэлдэхүүнд аймгийн ЗДТГ-ын ХБХ-ийн дарга Б.Баярсүх, НБХ-ийн дарга Б.Даваадорж, БСУГ-ын дарга М.Пүрэвхүү нар болон МХГ, ГХБХБГ-ын мэргэжилтнүүд багтан ажиллалаа. Мөн аймгийн Засаг дарын захирамжаар байгуулагдсан барилгын техникийн хяналт хийх ажлын хэсгийн ахлагч н.Цэдэнбал, ажлын хэсгийн гишүүдийн төлөөлөл багтан мэргэжлийн зөвлөгөө өгч ажиллав.