Энэ сарын 18-ны өдөр аймгийн Засаг даргын орлогч Ч. Уранчимэг Манхан суманд ажиллах үеэрээ сумын Эрүүл мэндийн төвийн үйл ажиллагаатай танилцаж, албан хаагчидтай уулзалт хийлээ. Тус сумын Эрүүл мэндийн төв нь 25 эмч, ажилтантай бөгөөд 2019 онд 6916 хүнд эрүүл мэндийн тусламж үйлчилгээг үзүүлж, Үндэсний 12, аймгийн 3 дэд хөтөлбөрийг хэрэгжүүлэн ажиллаж байна. Уг эмнэлэгт 2018 онд эхийн эндэгдэл гарсан тул 2019 онд эх барихын тусламж үйлчилгээнд онцгой анхаарахын зэрэгцээ уламжлалт эмчилгээ, сувилахуйн үйлчилгээг сайжруулан, БЗДХӨ, сүрьеэ, элэгний BC вирус илрүүлэх ажлыг эрчимжүүлэн ажиллаж байгаа талаар эмнэлэгийн хамт олон хэлж байлаа. Мөн эмнэлэгийн барилгыг төвлөрсөн халаалтад холбосонтой холбогдуулан аймгийн Засаг даргын нөөц хөрөнгөөс гаргахаар шийдвэрлэсэн сантехникийн хэрэгслийг солих ажлын төсвийг яаралтай гаргаж өгөх хүсэлтээ уламжиллаа. Үүнээс гадна тус эмнэлэг 2019 онд 42 сая төгрөгийн эмийг эмчилгээнд хэрэглэж, өр төлбөртэй гарсан тул сумдын хүн амын тооноос шалтгаалан эмийн эргэлтийн сангийн санхүүжилтийг нэмэгдүүлэх саналыг хэлж байсан юм.