Өчигдөр /2021.03.24/-нд Манхан сумын Баянгол багийн малчин Н.Нямдаваагийн хотонд ихэр ботго мэндэлжээ. Тодруулбал, малчин Н.Нямдаваа гуайн тэмээн сүргээс 4 настай хүрэн зүсмийн ингэ нь анхны төрөлтөөрөө ихэр ботго төрүүлж малч эзэн, нутаг хошуугаа баярлуулаад байна.

Н.Нямдаваа гуай өдгөө 59 настай, сүүлийн 21 жил мал маллаж яваа, 2000 оноос хойш тэмээн сүргийг өсгөн үржүүлэх, маллахад түлхүү анхаарч ирсэн, хашир туршлагатай малчдын нэг. Өнгөрсөн онд эднийх нийт 150 орчим толгой мал тоолуулсан үүний ихэнх нь тэмээ. Энэ хавар ах дүүгийн нйилсэн 60-аад ингэ ботголохоос одоогоор 40 гаруй нь төллөөд байна гэж малчин Н.Нямдаваа хэллээ.

Ховд аймгийн Засаг дарга Б.Дүгэржав: "Өнгөрсөн 2020 онд Чандмань суманд ингэ ихэрлэсэн. Тэгвэл энэ жил Манхан суманд ингэ ихэрлэлээ. Холын цэнхэр Ховдын хязгаар, Олон угсаатан Ховдчууд та бидний буян заяа, сайн сайхныг билэгдэн ийнхүү жил дараалан ингэ ихэрлэж байгаад аймгийн Засаг даргын хувьд туйлын баяртай байна. Малчин Н.Нямдаваадаа нийт ард иргэдийнхээ нэрийн өмнөөс баяр хүргэж сайн сайхныг хүсье" гэж цахим хуудастаа нийтэлжээ.