Тэдний нэг нь Нарийн гол багийн малчин С. Батболд Б. Дулмаа нар юм. Эднийх Хаваржингийн үзүүр, Байшинт, Нүцгэн, Ямаан ус гэдэг газруудаар нутагладаг. Тэд 1999 онд айл болж, эцэг өвгөдөөс өвлөж ирсэн мал сүргээ таван төрлөөр өсгөж, малынхаа ашиг шимийг хүртэн, амьдарч байна.

Эднийх тэмээн сүргийг түлхүү өсгөж монгол ёс уламжлалаа хадгалан тэмээгээр нүүдэллэдэг ажилч, хөдөлмөрч гэр бүл юмаа.

Малчин хүний амьдрал өглөөний нартай уралдан босож орой нар жаргах хүртэл тасралтгүй хөдөлмөрлөдөг тэсвэр тэвчээр шаардсан ажил. Б. Дулмаа нь малынхаа ашиг шимийг монгол уламжлалт аргаараа бэлтгэж сүү цагаан идээгээ боловсруулан эдийн засгийн эргэлтэд оруулдаг байна.

Эднийх таван охин нэг залуутай. Малчин С. Батболд удам залгах ганц залуугаа малчин болгож, мал маллах арга ухаанаа өвлүүлжээ. Амьдралын олон нугачаанд шантарч үзээгүй түүний хөдөлмөрч хичээнгүй зан чанарыг нутгийн зон олон сайшаан магтаж байлаа. Аймгийн аварга малчны шагналыг Засаг даргын орлогч Т. Жаргалсайханаар ахлуулсан ажлын хэсэг хот айлаар зочлон гардуулж, баяр хүргэлээ.