Монгол Улсын Ерөнхийлөгчийн 2010 оны 63-р зарлигийн дагуу жил бүрийн 5-р сарын хоёрдугаар долоо хоногийн Бямба гарагийг "Бүх нийтээр мод тарих үндэсний өдөр" болгон тогтоосон байдаг. Энэ хаврын бүх нийтээр мод тарих өдөр 5-р сарын 11-ний өдөр тохиож, Жаргалант сумын хэмжээнд урьдчилсан тооцоогоор 27 байгууллагын 400 гаруй хүн Жаргалант сумын 2019 оны ойжуулалтын төлөвлөгөөнд тусгагдсан газрууд болох "Ховд" дулааны станцаас "Нисэх" чиглэлд 200 улиас, Буянт голын бага гүүрийн дээд талын Мо Эн Ко ХХК-ийн торонд 1300 гаруй улиас, бургас тарьсан байна. Энэ жил тарьсан 1500 гаруй улиас, бургасны усалгаа, арчилгааг Жаргалант сум хариуцан ажиллах юм. Ховд аймгийн 17 суманд нийтдээ 7000 гаруй мод тарьсан талаарх урьдчилсан тооцоог аймгийн БОАЖГ-аас гаргасан бөгөөд албаны эх сурвалжийн мэдээлсэнээр энэ ажилд оролцоогүй ААН, байгууллагууд хуулийн дагуу мөнгөн торгуулийг "Хотын хөгжлийн төлөө сан"-д тушаасан байна. Өнгөрсөн хаврын мод тарих өдрөөр мөн л 10 га талбайд мод тарьсан бөгөөд 70 гаруй хувь нь ургажээ. Аймгийн хэмжээнд мод тарьж, ургуулах ажил үргэлжилж байгаа бөгөөд Монгол Улсын Ойн тухай хуульд заасны дагуу 16 насанд хүрсэн иргэн бүр нэг мод тарьж ургуулан, арчлах үүргээ биелүүлж, иргэдийг мод тарих ажилд идэвхтэй оролцохыг холбогдох албаныхан уриаллаа.