Жил бүрийн 3-р сарын 22-нд Казахын ард түмэн Нарны баяр буюу “Наурыз”-ын баярыг тэмдэглэдэг уламжлалтай. Тус баярыг тохиолдуулан олон төрлийн уралдаан тэмцээн, арга хэмжээнүүдийг хөтөлбөрийн дагуу зохион байгуулж байна. Үүний нэг нь аймгийн Засаг даргын ивээл дор 3-р сарын 18-ны өдөр аймгийн Хөгжимт драмын театрт зохион байгуулж буй харилцаа дууны “Ховд Айтыс-2019” олон улсын наадам юм. Казах үндэстний биет болон биет бус өвийг түгээн дэлгэрүүлж, соёл, зан заншлыг сурталчлан, өвлүүлэн үлдээх зорилгоор зохион байгуулж буй тус наадамд Казахстан Улсын Павлодар, Караганда, Дорнын Казахстан мужийн болон Баян-Өлгий, Ховд аймгийн 30 гаруй яруу найрагч (ахын) оролцож байна. Айтыс буюу Казах ардын уламжлалт цэц булаалдааныг 3 үе шаттайгаар явуулах бөгөөд оролцогчид тухайн цаг мөчид дуугаа зохион дуулж, хэл ярианы баялаг, дууны агуулга, дуулах ур чадвараараа өрсөлддөгөөрөө бусад төрлийн харилцаа дууны уралдаанаас ялгаатай юм. Тус наадмыг зохион байгуулснаар Казахын ард түмний эх хэлний нэгдмэл байдлыг баталгаажуулах, ардын уламжлалт цэц булаалдаанаар дамжуулан ард иргэдийн нэгнээ хүндэтгэх уламжлалыг залуу хойч үеийнхэнд таниулах чухал ач холбогдолтой болохыг зохион байгуулагчид онцоллоо. “Ховд Айтыс-2019” нь Ховд аймагт 3 дахь удаагаа зохион байгуулагдаж буй харилцаа дууны олон улсын наадам бөгөөд өмнө нь 2007, 2011 онд зохиогдож байжээ.