Эрдэнэбүрэн сумын Хонгио багийн малчин Ч.Цэдэндамба, Д.Дорждулам нар "Монгол улсын аварга малчин"- цол хүртлээ. Аваргын шагналыг ХХААХҮ-ийн сайд З.Мэндсайхан, Сангийн дэд сайд С.Мөнгөнчимэг, аймгийн Засаг дарга Б.Дүгэржав нар гардуулан өгч баяр хүргэв. Ч.Цэдэндамба гуай аав, ээжийнхээ малч ухаанд таван настай жаахан байхаасаа эхлэн суралцсан ба тэр цагаас хойш мал маллаж явна. 2014 онд "АЙМГИЙН АВАРГА МАЛЧИН", 2017 онд аймгийн "АЛДАРТ УЯАЧ"-аар шалгарч байсан туршлагатай малчдын нэг ээ. Тэрбээр, малынхаа үүлдэр угсааг сайжруулж, нэг малаас авах ашиг шимийг нэмэгдүүлэх үүднээс эцэг малыг сэлгэн малаа чанаржуулж байна. Эднийх 1600-аад толгой малтай. Энэ хавар 500 гаруй төл хүлээн авч мал сүргээ өсгөнө. 10-аад хүнийг малжуулж ажлын байраар хангажээ. 2002 онд Хонгио багийн малчин Х.Дамдинсүрэн, Ш.Сайнбилэг нарыг 250 толгой малаар малжуулж, айл болгожээ. Эдгээр залуус нь 2019 онд "Сумын сайн малчин" болсон байна.