Улсын төсвийн болон орон нутгийн 400 гаруй бизнес эрхлэгчдийн хөрөнгө оруулалтаар барьсан ч өмчлөлийн маргааны улмаас ашиглагдахгүй явсаар 3 дахь Засаг даргын нүүрийг үзэж буй “ЭВИЙН ХҮЧ” худалдааны төвийг бүрэн ашиглалтад оруулах тал дээр аймгийн Засаг даргын хувьд гол анхаарлаа хандуулан ажиллаж байна. Гарц, шийдэл юу байгаа талаар судалж ажилласны үндсэн дээр өнөөдөр аймгийн ИТХ-ын Тэргүүлэгчдийн хуралд “Ховд Эвийн хүч” орон нутгийн өмчийн оролцоотой аж ахуйн тооцоот үйлдвэрийн газар байгуулах тухай асуудлыг танилцууллаа. Ард иргэдийн хүлээлт, нийгмийн захиалга байгаа учраас хурлын Тэргүүлэгчид, мэргэжлийн байгууллагуудын албан тушаалтнууд, ЭВИЙН ХҮЧ” хоршооны зарим төлөөллийг байлцуулан олон талаас нь ярилцаж зөвшилцсөний эцэст “Эвийн хүч” ОНӨОААТҮГ-ыг байгуулах нь зүйтэй гэж үзэн холбогдох хуулийн дагуу аймгийн ИТХ-ын Тэргүүлэгчдийн тогтоол гарган баталлаа. Цаашид хийх ажил, шийдэх асуудал их бий. Юутай ч олон жил маргаан дагуулсан “ЭВИЙН ХҮЧ” худалдааны төвийг бүрэн ашиглалтад оруулж, үйл ажиллагааг нь жигдрүүлэхэд Хоршооны гишүүд түүхэн үүрэгтэй оролцож, хамтран ажиллана гэдэгт итгэл төгс байна.