Монголын Волейболын холбооноос жил бүр зохион байгуулдаг “Волейболын идэрчүүдийн Улсын аварга шалгаруулах тэмцээн” 2019 оны 04-р сарын 02-09-ний хооронд Ховд аймагт амжилттай болж өндөрлөлөө. Тус тэмцээнд бүсийн тэмцээний эхний 3 байранд шалгарсан эрэгтэй эмэгтэй нийт 31 багийн 400 орчим тамирчид, багш дасгалжуулагчдын хамтаар оролцож хурд хүч, авхаалж самбаагаа сорин өрсөлдлөө. Тэмцээнд Волейболын ОУХМ дасгалжуулагч Д.Баярболд, туслах дасгалжуулагч Г.Номин, Г.Хатантуул, Ж.Саруул ахлагчтай эмэгтэй баг тамирчид амжилттай оролцож Монгол Улсын аваргын Алтан медаль, Цомын эзэн боллоо. Ийнхүү 18 жил тасраад байсан медалийн буухиаг үргэлжлүүлж манай охид түүхэндээ анх удаа Монгол Улсын аварга, Алтан медалийн эзэд боллоо. Харин Хэнтий аймгийн баг тамирчид Мөнгөн медаль, Нийслэлийн Баянзүрх дүүргийн Хилчин спорт хорооны баг тамирчид Хүрэл медаль хүртлээ. Харин эрэгтэй баг тамирчдаас Нийслэлийн Баянгол дүүргийн баг тамирчид Алтан медаль, Баянзүрх дүүргийн Уурхайчин клубын баг тамирчид Мөнгөн медаль, Говь-Алтай аймгийн баг тамирчид Хүрэл меадаль тус тус хүртлээ. Тэмцээнд оролцсон нийт баг тамирчид, хамтран зохион байгуулсан Монголын Волейболын холбоо, УИХ-ын гишүүн, УБ хот дахь Нутгийн зөвлөлийн дарга С.Бямбацогт тэргүүтэй аймгийн Волейболын холбоо, БТСГ-ын нийт хамт олонд баярлаж талархсанаа илэрхийлж цаашдын ажилд нь амжилт хүсье. Тамирчны яруу алдар бадартугай.