Үенч сумын Нарийн гол багийн малчин М. Эрхэмбаяр, С. Оюунаа нар “Аймгийн аварга малчин” боллоо. Тэд багаасаа мал маллах арга ухаанд суралцаж, 2007 онд айл гэр болсноос хойш эрдэнэт мал сүргээ дөрвөн төрлөөр өсгөсөн байна. М. Эрхэмбаярынх сумаасаа 10 гаруй километрийн зайтай Урт үзүүр гэдэг газар хаваржиж байна. Эднийх Мөст, Үенч сумын нутгаар нутаглаж, өвс, ургамал сайтай шилээр голдуу малаа малладаг. Тэрээр малынхаа үүлдэр угсааг сайжруулах тал дээр ихээхэн анхаарч, Мөст сумын нутгаас эцэг малаа авч малаа чанаржуулжээ. Эднийх ам бүл 5. С. Оюунаа хүүхдүүдээ өсгөж хүмүүжүүлэхийн хажуугаар сүү цагаан идээгээ боловсруулж өөрсдөө хэрэглэн, ах дүү нартаа өгдөг байна. Тэрээр мал маллах арга ухааныг хөдөлмөрч ээж, ааваасаа өвлөж авсан. Түүний аав нь 2007 онд “Аймгийн аварга үхэрчин” болж байсан гэдэг. Үенч сумын нутгаар энэ жил дулаахан хаваржиж, эднийх 300 орчим төл бойжуулжээ. Ийнхүү мал аж ахуйн салбарт үр бүтээлтэй ажиллаж сум, аймгийнхаа эдийн засагт үнэтэй хувь нэмэр оруулж буй малчин М. Эрхэмбаярын хөдөлмөр зүтгэлийг үнэлж, шагналыг гардуулан өгсөн юм.