Ховд аймаг 2025 оныг баялаг бүтээгчдийг дэмжих жил болгон зарласан. Энэ хүрээнд орон нутгийн баялаг бүтээгчид, жижиг дунд үйлдвэрлэл, гарааны бизнесүүд, залуу энтрепренерүүд болон бодлого тодорхойлогчдын хамтын ажиллагааг бэхжүүлэх, бизнес эрхлэх орчныг сайжруулах, шинэ санаа, дэвшилтэт шийдлийг сум, орон нутагт нутагшуулах зорилгоор “Ховдын Бизнес Долоо хоног” арга хэмжээг өрнүүлж байна. Зорилтот долоо хоногийн хүрээнд бизнес, эдийн засаг, инновац, хөдөлмөр эрхлэлт, хүний хөгжил зэрэг олон талт хэлэлцүүлэг, үзэсгэлэн, зөвлөгөөн, өдөрлөг зэрэг арга хэмжээнүүдийг хуваарийн дагуу зохион байгуулахаар төлөвлөсөн. 
Үүний нэг нь “Баялаг бүтээгч Ховд-2025" бизнес эрхлэгчдэд тулгамдаж буй асуудлууд хэлэлцүүлэг юм. Өнөөдөр /2025.5.19/ болсон энэхүү хэлэлцүүлэгт хөдөлмөр эрхлэлтийн салбар зөвлөлийн гишүүд, Хөдөлмөр, халамжийн үйлчилгээний газрын удирдах албан тушаалтнууд, мэргэжилтэн, холбогдох төрийн байгууллагын төлөөлөл, бизнесүүдийг дэмжих төрийн бус байгууллагын төлөөлөл, банк болон бизнес эрхлэгчдийн төлөөлөл 20 гаруй хүн оролцлоо. 
Аймгийн Засаг дарга М.Амарсанаа хэлэлцүүлгийн үйл ажиллагаанд оролцож, оролцогчдод амжилт хүсэхийн сацуу баялаг бүтээгчид, бизнес эрхлэгчдээ хэрхэн дэмжиж ажиллах талаар мэдээлэл өгөв. Мөн энэхүү хэлэлцүүлгээс гарсан шинэ санаа, шийдлийг дэмжиж хамтран ажиллахаа илэрхийллээ. 
Хэлэлцүүлгийн үеэр тодорхой сэдвийн хүрээнд Стартап Монгол ТББ-ын сургагч багш нар мэдээлэл өгч, энэ чиглэлд тулгамдаж буй ямар асуудал байгаа талаар оролцогчдын саналыг сонсов. 
Ховд аймгийн Засаг даргын Тамгын газар, Хөдөлмөр, халамжийн үйлчилгээний газраас Стартап Монгол ТББ-тай хамтран зохион байгуулж буй “Ховдын Бизнес Долоо хоног” арга хэмжээ энэ сарын 19-23-ны өдрүүдэд явагдаж байна.
